sakit palandungon ang mga nanggapanghitabo sa atong nasud,
morag wa na gayuy katumanan ang mga damgo sa mga way nahot.
daw sa wa nay luna ang gugmag kaluoy sa mga mayukmok uyamot,
kanunay na lang AKO, AKO bisan ang kadaghanan nahisukamod!
asa na man ang gahom ug katungod sa katawhan sa pagpili?
matag eleksyon na lang: kagawasan gilabni, mga balota gisakmit.
gibaylo ang kinabuhi ug kaugmaon sa pipila lamang ka salapi.
kanunay na lang AKO, AKO, samtang ang uban gilingla, gigamit!
ang pilipinas karon nahisama sa baroto nga duha ang gagaud,
administrasyon ug oposisyon—mga dili mahadlokon kunog balud.
walay kabalisa bisan nga ang sakayan gianod nas bangis nga sulog,
kay nagsige man lag AKO, AKO bisan ang nasud hapit na mounlod!
katawhang nahigmata sa lawong pagkahinanok karon nanginlabot.
mga tingog migula sa baba nagsabwag sa bulawanong mga sugyot,
apan inay nga paminawon ug tagdon kining mga paningkamot,
nagpunay lang gihapog AKO, AKO ug gipahilom ang mga lumilihok!
mga bugsay sa bangkerong magdala unta nato sa atong padulngan,
gihimo man hinuong hinagiban pagpakgang sa buot motabang.
ang mga lungsuranon nga mitahan sa kaugalingon alang sa uban,
gidudahan, gihadlok, gikadenahan, gipatay ni AKO nga talawan!
busa, tuohan ta unta nga ang panaghugpong sa mga tawong yano
mas kusgan pa kaysa sa gahum ni AKO—mga "bantogang" politiko.
higala pamalandongi kini ug ang imong boto ayaw intawon usiki.
ug ikaw nga ginganlag AKO, tulisukon ka unta sa imong ANINO!
bay uray
(marso 24, 2007)
No comments:
Post a Comment